Bu gün şəhid Rövşən İbrahimov və Hikmət Həsənovun doğum günüdür.
Rövşən Əlövsət oğlu İbrahimov 15 iyul 1972-ci ildə Gəncədə anadan olub. Orta təhsilini 6 nömrəli məktəbdə alıb. 1990-1992-ci illərdə Rusiyanın Vaskrisenski şəhərində hərbi xidmətdə olub. Avtomexanika texnikumunu bitirib.
27 fevral 1993-cü ildə Kəpəz rayon Hərbi Komissarlığı tərəfindən səfərbərliyə alınıb. 703 saylı Gəncə batalyonunda xidmət edib.
Rövşən Əlövsət oğlu İbrahimov 27 may 1993-cü ildə Maqagiz kəndi ətrafında növbəti kəşfiyyat zamanı düşmən gülləsinə tuş gələrək şəhidlik zirvəsinə ucalıb.
Hikmət Fikrət oğlu Həsənov 15 iyul 1986-cı ildə Gəncədə anadan olub. 1993-2004-cü illərdə 16 nömrəli məktəbdə təhsil alıb. 2004-cü ildə həqiqi hərbi xidmətə çağırılıb. 2018-ci ilin iyun ayından «N» saylı hərbi hissədə MAXE hərbi qulluqçu kimi xidmət etməyə başlayıb.
Vətən müharibəsi zamanı Murovdağ zirvəsinin azad olunmasında yaxından iştirak edib. Hikmət Fikrət oğlu Həsənov 1 oktyabr 2020-ci ildə cəbhədə gedən ağır döyüşlərin birində şəhidlik zirvəsinə yüksəlib.
O, ölümündən sonra “Vətən uğrunda” medalı ilə təltif olunub.
