Bu gün şəhidlərimiz Mahir Əhmədov və Canlar Cavadovun doğum günüdür.
Mahir Tahir oğlu Əhmədov 18 iyul 1963-cü ildə Gəncədə anadan olub. Orta təhsilini 25 saylı orta məktəbdə alıb. 27 saylı texniki-peşə məktəbində elektrik mantyoru peşəsinə yiyələnib. 1981-1983-cü illərdə Gürcüstanda xidmətdə olarkən BTR-i tam idarə etməyi öyrənib.
Daha sonra bir müddət Alüminium zavodunda işləyib. 1992-ci ilin yanvar ayında Mahir könüllü olaraq, Qarabağda döyüşlərə qatılıb. Gülablı, Daşaltı, Ağdərə əməliyyatlarında iştirak edib.
Mahir Tahir oğlu Əhmədov 14 aprel 1992-ci ildə Sırxavənd uğrundakı döyüşdə şəhidlik zirvəsinə ucalıb.
Canlar Aqil oğlu Cavadov 18 iyul 1980-cı ildə Gəncədə anadan olub. 1998-ci ildə 18 nömrəli tam orta məktəbi bitirib.
2004-cü ildə hərbi xidmətə çağırılıb və Naxçıvan Muxtar Respublikasında qulluq edib. Daha sonra “N” saylı hərbi hissədə kursant, başqa hərbi hissədə isə kiçik çavuş rütbəsinə təyin edilərək sanitar kimi xidmətini davam etdirib.
Vətən müharibəsi zamanı MAXE hərbi qulluqçu Cavadov Goranboy rayonu ərazisində, Murovdağ istiqamətində gedən döyüşlərdə vuruşub. Canlar Aqil oğlu Cavadov 29 sentyabr 2020-ci ildə şəhidlik zirvəsinə ucalıb.
O, ölümündən sonra “Vətən uğrunda” medalı ilə təltif edilib. Şəhidimizin Vətənə əmanət 7 övladı yadigar qalıb.
