Bu gün şəhid Vüsal Əliyev və Taleh Abdullayevin doğum günüdür.
Vüsal Elxan oğlu Əliyev 6 iyun 1976-cı ildə Gəncədə anadan olub. 30 saylı orta məktəbi bitirdikdən sonra 9 avqust 1994-cü ildə Kəpəz Rayon Hərbi Komissarlığı tərəfindən həqiqi hərbi xidmətə çağırılıb. Əvvəlcə Pirəkəşgüldə rabitəçi peşəsinə yiyələnıb. Daha sonra Beyləqan rayonunda əsgəri xidmətə yollanıb. Hərbi xidmətə çağırılmaqdan öncə avtomobil çilingəri peşəsini öyrənib.
Vüsal Elxan oğlu Əliyev 11 nəfər əsgər yoldaşı ilə birlikdə 24 avqust 1995-ci ildə kəşfiyyatdan qayıdarkən Harami düzündə minaya düşüb, şəhidlik zirvəsinə ucalıb. Onun meyiti iki gün sonra Gəncə şəhərinə gətirilərək, Şəhidlər xiyabanında dəfn edilib.
Taleh Məhərrəm oğlu Abdullayev 6 iyun 1993-cü ildə Gəncədə anadan olub. 2011-ci ildə Gəncə şəhər 25 nömrəli tam orta məktəbi bitirib. Həmin il həqiqi hərbi xidmətə çağırılıb.
29 sentyabr 2020-ci il tarixində Vətən müharibəsi ilə əlaqədar yenidən hərbi xidmətə cəlb olunub. Tərtər rayonunun Suqovuşan kəndi, Füzuli, Cəbrayıl, Qubadlı rayonlarının azadlığı uğrunda gedən döyüşlərdə iştirak edib.
Taleh Məhərrəm oğlu Abdullayev 17 oktyabr 2020-ci ildə Füzuli rayonunda şəhidlik zirvəsinə ucalıb. Onun Vətənə əmanət iki övladı qalıb. Abdullayev ölümündən sonra dörd medalla təltif olunub.
