Bu gün şəhid Saməddin Hüseynov və Mübariz Əsgərovun doğum günüdür.
Saməddin Fərman oğlu Hüseynov 7 iyul 1973-ci ildə Gəncədə anadan olub. Orta təhsilini Yeni Gəncə qəsəbəsindəki 2 nömrəli orta məktəbdə alıb. 1992-ci ildə Nizami Rayon Hərbi Komissarlığı tərəfindən həqiqi hərbi xidmətə çağırılıb. Lənkərandakı rabitə batalyonunda rabitəçi vəzifəsində xidmət edib.
O, hərbi hissənin Fəxri Fərmanına layiq görülüb. Beyləqan-Ağdam bölgəsində, xüsusən Şelli kəndinin müdafiəsində qəhrəmanlıq göstərib. Yüksək hərbi xidmətinə görə hərbi hissə komandiri tərəfindən Hüseynovun ailəsinə təşəkkür məktubu göndərilib.
Saməddin Fərman oğlu Hüseynov 15 dekabr 1993-cü ildə Beyləqanda döyüş zamanı dostlarını xilas edərkən şəhidlik zirvəsinə ucalıb.
Mübariz Məmmədəli oğlu Əsgərov 7 iyul 1973-cü ildə Gəncədə anadan olub. 37 saylı şəhər orta məktəbində təhsil alıb. Daha sonra sürücü ixtisasına yiyələnıb. 1992-ci ildə Kəpəz Rayon Hərbi Komissarlığı tərəfindən həqiqi hərbi xidmətə çağırılıb. Nümunəvi xidmətə görə hərbi hissə komandiri tərəfindən yeddi günlük məzuniyyətlə təltif edilib.
O, 20 iyun 1992-ci ildə Ağdam rayonu Aranzəmin kəndində mühasirəyə düşüb. Mübariz Məmmədəli oğlu Əsgərov son anda düşmənə təslim olmamaq üçün əlindəki qumbaranı sinəsinə sıxaraq şəhidlik zirvəsinə ucalıb.
