Bu gün şəhid Rauf Abdullayevin doğum günüdür.
Rauf Qara oğlu Abdullayev 14 iyul 1962-ci ildə Gəncədə anadan olub. 1977-ci ildə 44 nömrəli məktəbin 8-ci sinfini qurtarıb, təhsilini 27 saylı texniki peşə məktəbində davam etdirib. 1980-1982-ci illərdə Çita vilayətində həqiqi hərbi xidmətdə olub.
Qayıtdıqdan sonra ixtisası üzrə Alüminium zavodunda əmək fəaliyyətinə başlayıb. Zavodda işlədiyi zaman, 5 may 1993-cü il tarixində torpaqlarımızın müdafiəsi uğrunda könüllü olaraq cəbhəyə yollanıb. O, 709 saylı hərbi hissənin tərkibində xidmət edib. Bir neçə kəndin müdafiəsində igidlik göstərib. Tərtər-Ağdam istiqamətində qanlı döyüşlərdə vuruşub.
Rauf Qara oğlu Abdullayev 10 iyul 1993-cü ildə Ağdam uğrunda gedən qızğın döyüşlərin birində şəhidlik zirvəsinə ucalıb. 13 iyul tarixində Gəncə Şəhidlər xiyabanında dəfn olunub.
Şəhidimizin Vətənə əmanət 2 oğul və 1 qız övladı qalıb.
