Gəncədə şəhidin anım günü keçirilib. Bu haqda 4 oktyabr tarixində Regional Mədəniyyət İdarəsinə istinadən xəbər veririk.
Vətən müharibəsində şəhidlik zirvəsinə ucalan Hikmət Məmmədovun anım günü ilə bağlı tədbir təşkil olunub. Burada şəhid anaları, qazilər, Regional Mədəniyyət İdarəsinin rəisi vəzifəsini icra edən Pərvin Kazımov, DTMQ-nin direktoru Vüsal İbrahimov, şəhidin ailə üzvləri, təhsil aldığı məktəbin müəllim və şagird kollektivi, GDU-nun müəllim və tələbələri iştirak ediblər. Tədbirdə şəhidimizin əziz xatirəsindən və keçdiyi şücaətli döyüş yolundan danışılıb.
Hikmət Məmmədov Dövlət Tarix-Mədəniyyət Qoruğunun əməkdaşı olub. Prezident tərəfindən ölümündən sonra “Vətən uğrunda”, “Kəlbəcərin azad olunmasına görə” və “Hərbi xidmətlərə görə” medalları ilə təltif edilib.
Qeyd edək ki, anım günü Regional Mədəniyyət İdarəsinin, Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin və Gəncə Dövlət Tarix – Mədəniyyət Qoruğunun birgə təşkilatçılığı ilə keçirilib.
