Gəncədə sakinlər divarların çatlamasından narahatdırlar. Bu haqda Gencexeber.az-a 19 iyul tarixində məlumat daxil olub.
Sözügedən hal şəhərin Heydər Əliyev prospektindəki 95 saylı binada müşahidə olunur. Sakinlər bildirirlər ki, tikilinin birinci mərtəbəsində yerləşən mənzilləri “Ağ Çiçəyim” gül salonu alıb. Onlar arakəsmə divarları sökərək mağaza üçün geniş ərazi yaradıblar. Binada yaşayan sakinlərin sözlərinə görə, bu vaxt sütunlardan biri də sökülüb. Nəticədə mağazada qapı örtüləndə yuxarı mərtəbələrdə yerləşən mənzillər silkələnir.
“Mağaza açılandan sonra evdə oturmağa qorxuruq. Aşağıda qapını bir az bərk örtəndə bütün ev silkələnir. Divarlarımız çat-çat olub. Bir müddət öncə təmir etdik mənzili, amma yenə eyni vəziyyətlə üzləşdik. Hamamda kafel çatlayıb tökülür. Sakinlərin bir çoxu evlərini qoyub gedib. Aidiyyəti qurumlardan məsələ ilə bağlı müvafiq tədbirlərin görülməsini istəyirik”, - deyə əhali bildirir.
