Gəncədə qadınlarla bağlı tədbir keçirilib. Bu haqda 27 aprel tarixində Ailə, Qadın və Uşaq Problemləri üzrə Dövlət Komitəsinə istinadən məlumat veririk.
Görüş “Güclü cəmiyyətin zərif simaları” layihəsi çərçivəsində baş tutub. Tədbirin açılışında Dövlət Komitəsinin, “Regional İnkişaf” İctimai Birliyinin və İcra Hakimiyyətinin nümayəndələri çıxış ediblər. Onlar Azərbaycan qadınının mənəvi və ailə dəyərlərinin qorunması, gənc nəslin düzgün formalaşdırılması və cəmiyyətin inkişafındakı müstəsna rolundan danışıblar.
Görüş ölkəmizdə fərqli sahələrdə uğur qazanmış qadınların TEDx formatında çıxışları ilə davam edib. Burada "Bağçam" Uşaq Bağçaları Şəbəkəsinin qurucusu və İdarə Heyətinin sədri Samirə Dünyamalıyeva və “AZTUGEM” MMC-nin direktoru, beynəlxalq təşkilat olan WILAT-nin (Women In Logistics And Transport) Azərbaycan üzrə əlaqələndirici məsul şəxsi Lamiyə Xəlilova öz uğur hekayələri və təcrübələrini bölüşərək, motivasiyaedici söhbət aparıblar.
Qeyd edək ki, layihənin məqsədi regionlarda yaşayan qadınlar, yeniyetmə və gənc qızların şəxsi və liderlik bacarıqlarının inkişafına dəstək vermək, ictimai fəallığını təşviq etməkdir.
