Gəncədə sürücülər və piyadalar yollarda təhlükə ilə üzləşirlər. Bu haqda 25 iyul tarixində Kəpəz televiziyasına istinadən xəbər veririk.
Şəhərdə hərəkətin daha sıx olduğu əsas küçə və prospektlərdə rəngi solmuş, hətta bəzi yerlərdə tamamilə görünməyən piyada zolaqları mövcuddur. Bu hal sürücülər və piyadalar üçün təhlükəyə çevrilib.
“Məktəblərin qabağına işıqfor qoymaq lazımdır. Zolaq silinib, təzələnsəydi, yaxşı olardı. Başqa yerdən gələn insanlar bilmirlər. Uşaqdır, birdən qaçar, zolağa görə hadisə baş verə bilər. Ölümlə nəticələnə bilər, şikəst qala bilərlər”, – deyə sakinlər bildiriblər. Sürücülərin sözlərinə görə, yollarda piyada zolaqları görünmür, nişanlar isə ağacın arxasında qalır. Bu səbəbdən qəza şəraiti yaranır. Onlar zolaqların yenilənməsini istəyirlər.
Məsələ ilə bağlı nəqliyyat məsələləri üzrə ekspert bildirib ki, boyaların davamlılıq müddəti təxminən 1 ildir və həmin müddətdən sonra boyalar yenilənməlidir. Burada cəmiyyət özü də aktiv olmalıdır. Ola bilsin ki, pozulan boyalardan müvafiq qurumların xəbəri olmasın, amma cəmiyyət bu mövzu haqqında məlumat verməlidir.
Həmçinin AYNA-dan əhalinin narahatlığına səbəb olan problemin tezliklə aradan qaldırılacağı açıqlanıb.
