Gəncədə növbəti mülki müdafiə təlimi keçirilib. Bu haqda 5 avqust tarixində İcra Hakimiyyətinə istinadən məlumat veririk.
“İrimiqyaslı fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda kompleks mülki müdafiə təlimi “Azəralüminium” ASC-nin Gəncə Gil-Torpaq İstehsalat Sahəsinin ərazisində baş tutub.
Öncə İcra Hakimiyyətinin inzibati binasında müşavirə keçirilib. Tədbirdə icra başçısı Niyazi Bayramov və Mülki Müdafiə İşinin Təşkili Baş İdarəsinin rəisi Niyazi Zamanov çıxış ediblər.
Sonra kompleks mülki müdafiə təliminə start verilib. Məqsəd dislokasiya ərazisində mülki müdafiə planlarının reallığının yoxlanılması, mülki müdafiə idarəetmə orqanlarının, fövqəladə hallar komissiyalarının, rəhbər və komandir-rəis heyətinin fövqəladə hadisələr zamanı fəaliyyət üzrə bilik və bacarıqlarının artırılması, rabitə və xəbərdarlıq sistemlərinin etibarlılığının təmin olunması, ehtimal olunan fövqəladə hadisələr zamanı mülki müdafiə xidmətlərinin və hərbiləşdirilməmiş mülki müdafiə dəstələrinin yüksək hazırlıq rejiminə gətirilməsi olub.
