Xəbər verdiyimiz kimi, sentyabrın 28-dən etibarən müasir elektrik qatarları ilə Gəncə–Mingəçevir–Ağstafa istiqamətində müntəzəm reyslər başlayacaq. Bu ərəfədə, sentyabrın 27-də rəmzi sınaq reysi həyata keçirilib. Həmin reysin sərnişinləri arasında Gəncə şəhərini təmsil edən deputat Naqif Həmzəyev də olub.
Millət vəkili Gencexeber.az-a açıqlamasında dəmir yolu sahəsində aparılan islahatlar və yaxın perspektivlər barədə fikirlərini bölüşüb.
"Xüsusilə məhz müasir qatarların reysdə olması bizi sevindirir. Bilirsiniz ki, Gəncə Azərbaycanın ikinci böyük şəhəri və tarixi paytaxtıdır. Gəncə Qazaxdan Yevlaxa qədər bölgənin əsas aparıcı şəhəri hesab olunur. Gəncə Qarabağ bölgəsinə də yaxındır.
Mingəçevir–Gəncə–Ağstafa reysinin işə düşməsi həmin ərazidə yaşayan insanlar üçün rahatlıq yaradacaq. Mingəçevir turistik baxımdan çox zəngin şəhərdir. Bizim Gəncə camaatı da çox vaxt istirahət üçün Mingəçevirə yollanır. Gəncədən Ağstafa istiqamətinə gedən, eləcə də Mingəçevir və Ağstafadan Gəncəyə gələn sakinlərimiz də var. Ticarət və müxtəlif ehtiyaclarını qarşılamaq üçün yaxın bölgələrdən demək olar hər kəs Gəncəyə üz tutur. Bu reysin gündə iki dəfə işləməsi həm müəyyən problemləri aradan qaldıracaq, həm də əlavə rahatlıq yaradacaq. Eyni zamanda qiymətlər də olduqca münasibdir. Avtomobildənsə, qatarla gəlib-getmək həm rahat, həm də təhlükəsizdir. İnanıram ki, regionlararası qatar reyslərinin sayı artırılsa, daha yaxşı olar. Ehtimal olunur ki, yaxın zamanda Gəncədən Ağdama, Xankəndiyə, hətta Lənkərana qədər də qatarla gedə biləcəyik" - deputat bildirib.
N.Həmzəyev Gəncədən bölgələrə yola düşəcək daha bir reysin açılacağını da söyləyib:
"Gəncədə 3 böyük universitet var. Burada çoxlu sayda tələbə təhsil alır. Onların və ailələrinin digər şəhərlərə gedib-gəlməsi üçün bu cür qatarlara ehtiyac var. Xüsusilə də paytaxtdan asılılığı müəyyən qədər aradan qaldırmaq lazımdır. ADY tərəfindən yeni qatarlar alındıqdan sonra Gəncə–Ağstafa–Qəbələ reysinin də istifadəyə verilməsi gözlənilir."
