Gəncədə sahibsiz it tüfənglə vurulub.
Gencexeber.az-a heyvansevərlər tərəfindən verilən məlumata görə, hadisə şəhərin Bağman yaşayış massivində baş verib. Sahibsiz küçə iti naməlum şəxs və ya şəxslər tərəfindən tüfənglə vurulub. Yaralı vəziyyətdə aşkarlanan heyvan dərhal baytara çatdırılıb.
Müayinə zamanı itin bədənində dörd ədəd güllə yarası aşkar edilib. Baytarların səylərinə baxmayaraq, ağır xəsarət alan heyvanın həyatını xilas etmək mümkün olmayıb.
Heyvansevərlərin iddiasına görə, bu qəddar əməl Gəncə şəhər Mənzil Kommunal Təsərrüfatı İstehsalat Birliyinin (MKTİB) əməkdaşları və ya ərazidə yaşayan sakinlər tərəfindən törədilə bilər.
Məsələ ilə bağlı MKTİB tərəfindən Gencexeber.az-a verilən açıqlamaya görə, Gəncə şəhər Mənzil Kommunal Təsərrüfatı İstehsalat Birliyi şəhər ərazisində sahibsiz küçə heyvanlarının odlu silahla öldürülməsi və yaxud yaralanması kimi hallarını həyata keçirmir:
"Gəncə ərazisində MKTİB-nin əməkdaşları tir tüfəngləri ilə itləri atıb, öldürülməsinə hədəfləniblər" iddiaları tamamilə əsassız və böhtan xarakterlidir. Məsələnin araşdırılması MKTİB-nin nəzarətindədir. Bir qrup dırnaqarası heyvansevərlər bu kimi hallarla qarşılaşdıqda, yalan informasiya yaymaqdansa, bununla bağlı hüquq mühafizə orqanlarına müraciət etmələri tövsyə olunur", – adıçəkilən qurumun açıqlamasında qeyd olunur.
Gəncə sakinləri hadisəyə hüquqi qiymət verilməsini və günahkarların cəzasız qalmamasını tələb edirlər.
