Gəncədə “Vəkil günü” ilə əlaqədar tədbir keçirilib. Bu haqda 29 dekabr tarixində Gəncə Dövlət Universitetinə istinadən məlumat veririk.
Gəncə Dövlət Universitetində “Vəkil günü” ilə əlaqədar 1 saylı Vəkillər Bürosunun sədri Camal Əliyev və vəkillər – Səadət Seyidli, Elnur Əliyev, Elsəvər Məmmədov və Asif Abdullayevin iştirakı ilə tədbir baş tutub. GDU-nun prorektoru Gülsüm Fətəliyeva vəkilləri peşə bayramı münasibətilə universitet rəhbərliyi adından təbrik edib.
Tədbirdə çıxış edən vəkillər cəmiyyətdə insanlara hüquqi yardımın göstərilməsindən, hər bir şəxsin öz hüquqlarının qanunla qorunan mənafelərinin müdafiəsindən, vəkillik fəaliyyətinin əsas prinsiplərindən ətraflı söhbət açıblar. Qeyd edilib ki, Vəkillər Kollegiyasının əsas vəzifəsi hər bir şəxsin hüquq və azadlıqlarının, qanunla qorunan mənafelərinin müdafiə edilməsindən, onlara peşəkar, yüksək keyfiyyətli, vicdanlı hüquqi yardım göstərilməsini təmin etməkdən, vəkillik peşəsinin nüfuzunu yüksəltməkdən ibarətdir.
Sonda tədbir iştirakçılarının sualları vəkillər tərəfindən cavablandırılıb.
