Qazax rayonunda ər-arvad arasında baş verən mübahisə cinayətlə nəticələnib.
Rayonun kəndlərindən birində 1986-cı il təvəllüdlü Mehdi (ad şərtidir – red.) yaşadıqları evdə həyat yoldaşı Samirə (ad şərtidir – red.) ilə mübahisə edib.
İstintaq materiallarına əsasən, şəxsi münasibətlər zəminində yaranan mübahisə zamanı Mehdi yumruq və şillə ilə həyat yoldaşının üzünə xəsarətlər yetirib. Onun barəsində Cinayət Məcəlləsinin 128-ci maddəsi ilə ittiham irəli sürülüb. O, özünü elan olunmuş ittiham üzrə təqsirli bilib.
Təqsirləndirilən şəxsin sözlərinə görə, həyat yoldaşı ilə münasibətləri əvvəllər yaxşı olsa da, son bir ildə pisləşib. O, bunun səbəbini Samirənin evdə səliqəyə riayət etməməsi ilə əlaqələndirib. Mehdi bildirib ki, özünün təmizkar olması səbəbindən həyat yoldaşının bu xüsusiyyətini bəyənməyib və buna görə də dəfələrlə aralarında mübahisə yaranıb.
Mehdi bildirib ki, hadisə günü də evə gələndə hər yeri səliqəsiz görüb, əsəbiləşərək yumruq və şillə ilə arvdının üzünə zərbələr vurub.
Qazax Rayon Məhkəməsinin hökmü ilə Mehdi 10 ay müddətinə azadlığın məhdudlaşdırılması cəzasına məhkum edilib.
