Gəncə təhsil ocağında müəllim olan xanım "İlin Gənc Müəllimi-2022" müsabiqəsində iştirak edib. Bu haqda 27 mart tarixində AzEdu.az-a istinadən xəbər veririk.
Milli Məclisin Mədəniyyət komitəsinin AzEdu.az təhsil portalı ilə birgə keçirdiyi "İlin Gənc Müəllimi-2022" müsabiqəsi yekunlaşıb. Gəncə şəhəri 4 nömrəli tam orta məktəbinin müəllimi Leyla Camalzadə müsabiqənin ilk 10-luğunda qərarlaşıb. Müəllimimiz 26.3 balla (Münsiflər 18.3; Səsvermə 8) 9-cu pilləyə yiyələnib.
Beynəlxalq “Global Teacher” müsabiqəsinin şərt və meyarlarını əsas götürən “İlin gənc müəllimi” müsabiqəsi üç turla həyata keçirilib. Birinci mərhələdə iştirakçılar müraciət formasını doldurublar. Hər bir müəllim şəxsən özü ona təqdim olunan sualları cavablandırıb.
Daha sonra ilk 50 nəfər arasından 10 müəllim sonuncu mərhələyə keçib.
Müsabiqənin məqsədi motivasiya dolu həyat hekayələri, ilhamverici fəaliyyətləri ilə şagirdlərə, eləcə də müəllim həmkarlarına dəstək olan, müasir dərs metodları ilə keyfiyyətli və yaradıcı təhsil mühiti yaradan, cəmiyyət üçün faydalı işlər görən ən yaxşı gənc pedaqoqları ortaya çıxarmaq, onları tanıtmaq və mükafatlandırmaqdır.
