Gəncə təmsilçisi yeni mövsümə hazırlaşır. Bu haqda 7 oktyabr tarixində Kəpəz televiziyasına istinadən məlumat veririk.
Ötən mövsüm ölkə ikincisi olan “Gəncə” BK-nın heyəti tamamilə yenilənib. Baş məşqçi postuna türkiyəli Bedri Meriç gətirilib və ayrı-ayrı mövqelərə həm yerli, həm də əcnəbi basketbolçular transfer edilib. Yeni heyət, əsasən, gənclərdən ibarətdir. Komanda 10 gündən çoxdur ki, hazırlığa başlayıb. Klubun transfer çalışmaları, demək olar ki, yekunlaşıb.
“Sarı-göylər” yeni mövsüm üçün heyətinə 12 oyunçu cəlb edib. Onlardan 6-sı yerli, digər yarısı isə əcnəbi basketbolçulardır. Xarici oyunçulardan 1-i Kanadadan, 5-i isə ABŞ-dəndir.
Qeyd edək ki, Basketbol Liqasında 2023/2024 mövsümü 22 oktyabrda başlayacaq. Bu mövsüm komanda sayı artırılıb və çempionatda 10 kollektiv mübarizə aparacaq.
