Fikrət Əmirov adına Gəncə Dövlət Filarmoniyasında Azərbaycan Bəstəkarlar İttifaqının 90 illiyinə həsr olunmuş səyyar plenum başa çatıb. Bu haqda 18 iyun tarixində Azərbaycan Dövlət Akademik Opera və Balet Teatrına istinadən xəbər veririk.
Səyyar plenumun son günündə “İntizar”operası təqdim edilib. Səhnə əsərinin librettosu filologiya elmləri doktoru professor Nərgiz Paşayevaya məxsusdur. Xalq artisti, Azərbaycan Bəstəkarlar İttifaqının sədri professor Firəngiz Əlizadənin “İntizar” operası Azərbaycan Dövlət Akademik Opera və Balet Teatrı tərəfindən nümayiş olunub.
Opera Xalq artisti Əkrəm Poladov, Əməkdar artistlər Ramil Qasımov, İnarə Babayeva, İlahə Əfəndiyeva, Tural Ağasıyev, solistlər Taleh Yahyayev, Fəhmin Əhmədlinin iştirakları ilə baş tutub. Tamaşanın quruluşçu rejissoru Əməkdar incəsənət xadimi Hafiz Quliyev, dirijoru Əməkdar artist Əyyub Quliyev, xormeyster Əməkdar incəsənət xadimi Sevil Hacıyevadır.
