Gəncə şəhər Mərkəzləşdirilmiş Kitabxana Sisteminin 6 saylı Gənclər Kitabxanasında tədbir olub. Bu haqda 22 iyul tarixində Mərkəzləşdirilmiş Kitabxana Sisteminə istinadən xəbər veririk.
Amerika yazıçısı, Nobel mükafatı laureatı Heminquey Ernest Millerin anadan olmasının 125 illiyi ilə bağlı "Əcəl zəngi" başlığı altında kitab müzakirəsi keçirilib. Əvvəlcə şəhidlərin ruhu bir dəqiqəlik sükutla yad edilib.
Qeyd edilib ki, XX əsrin görkəmli Amerika yazıçısı Ernest Heminquey öz bədii yaradıcılığı ilə Amerika ədəbiyyatının şöhrətini bütün dünyada təsdiqlədən böyük söz ustadlarından biridir. "Əcəl zəngi" romanı Heminquey yaradıcılığında ən sanballı əsərlərdən biri olmaqla yanaşı, həm də dünya ədəbiyyatında faşizm əleyhinə yazılmış ən qüdrətli bədii örnəklərdən biridir. Haqsız axıdılan qanların hələ qurumadığı bir vaxtda, 1937-1940-cı illər arasında qələmə alınan roman yazılarkən amansız savaşın faciəli sonluğu hələ hamının yaddaşında yaşamaqda idi.
