Gəncədə dini mövzularla bağlı tədbir keçirilib. Bu haqda 15 avqust tarixində İcra Hakimiyyətinə istinadən məlumat veririk.
“Dinin siyasiləşdirilməsi, dini təhlükəsizliyə təhdid kimi” mövzusunda tədbir İcra Hakimiyyətinin dəstəyi, Dini Qurumlarla İş üzrə Dövlət Komitəsinin Gəncə-Daşkəsən regional bölməsi və Gəncə-Daşkəsən Regional Mədəniyyət İdarəsinin birgə təşkilatçılığı ilə baş tutub. Burada DQİDK-nın Gəncə-Daşkəsən regional bölməsinin müdiri vəzifəsini icra edən Həsən Məmmədov, müdir müavini Elmar Fətəliyev, Regional Mədəniyyət İdarəsinin rəisi Pərvin Kazımov, Şah Abbas “Cümə” məscidinin icma sədri Əlisəftər Səfərəliyev çıxış ediblər.
Tədbirdə bildirilib ki, dini kimliyin milli kimliyi üstələməsi və başqa çoxşaxəli proseslər nəticəsində təzahür edən dinin siyasiləşdirilməsi tendensiyası dövlət maraqları baxımından çox təhlükəlidir. Ölkəmizdə dinlər və məzhəblərarası qarşıdurmalar baş verməyib, milli, dini və məzhəb ayrı-seçkiliyinə yol verilmir, eləcə də hər kəsin vicdan azadlığına təminat verilir.
Mövzu ətrafında fikir mübadiləsi aparılıb, tədbir iştirakçılarını maraqlandıran suallar cavablandırılıb.
Sonda DQİDK-nın sifarişi ilə çəkilmiş “Din və yad təsirlər” adlı sənədli film nümayiş olunub.
