Gəncədə deputat olmaq istəyən şəxs vətəndaşlarla görüşüb. Bu haqda 15 avqust tarixində Azxəbər-ə istinadən məlumat veririk.
Endokrinoloq Jalə Oqtayzadə şəhərimizi ziyarət edib. O, Yeni Qəsəbə, 2 ünvanında yaşayan Xankəndi sakinlərinə baş çəkib.
Görüşlər zamanı həkim seçicilərin problemləri və təkliflərini dinləyib, məsələlərin həlli üçün müvafiq qeydlər aparıb. Həmçinin seçki platforması barədə onlara ətraflı məlumat verib.
Jalə Oqtayzadə həmçinin Birinci Qarabağ müharibəsi veteranı Yaşar Quliyevin də evində qonaq olub. Vətəndaş bildirib ki, Xankəndini sonuncu tərk edən azərbaycanlıdır.
"Xankəndidən sonuncu olaraq bizim ailəmiz köçdü. Zorge küçəsində yaşayırdıq. Xankəndidən Şuşaya köçdük, daha sonra müharibə başladı və mən ön cəbhədə vuruşdum. Sağ qolum orada yaralandı, dövlətimizin dəstəyi ilə xarici ölkələrə yollandım, uzun müalicələrdən sonra qolum amputasiya olunmaqdan xilas oldu. Amma gördüyünüz kimi əlillik dərəcəm var. Oğlum Həzrət Quliyev də 44 günlük Vətən müharibəsinin iştirakçısıdır, ön cəbhədə vuruşub, qəlpə yarası alıb. Bu vətən bizim hamımızındır. İstəyərdik ki, Milli Məclisdə də Xankəndini və xankəndililəri sevən namizədimiz olsun. Sizə uğurlar arzu edirəm, gənclərin yolu daim açıq olsun, biz də bu prosesdə onlara dəstəyik”, – deyə, o, qeyd edib.
