Gəncədə sakinlər şəhərlərarası ictimai nəqliyyatla bağlı problem yaşayırlar.
İzləyicimizdən Gencexeber.az-a daxil olan məlumata əsasən, o, hər gün Daşkəsən rayonunun Bayan kəndinə işə getməkdə çətinlik çəkir. Vətəndaş Bayan kənd ümumi orta məktəbində çalışdığını bildirir.
O, artıq bir neçə ildir ki, hər gün eyni problemlə üzləşir:
“Gəncə-Daşkəsən marşrutunun ilk reysi 07:40-dır. Mənim azyaşlı uşağım olduğu üçün, səhərlər onu Gəncədə məktəbə yola salıram. Bu səbəbdən ikinci, yəni 08:10-da yola düşən avtobusa gəlib çatıram. Deyirlər ki, həmin nəqliyyat vasitəsinin sürücüsü işə çıxmayıb. Növbəti avtobusu gözləyirik, 08:40-da gəlməlidir. O da gəlib çıxmır, bildirilir ki, avtobus xarab olub. Narazılığımızı dilə gətirəndə və başqa avtobusun yola çıxmasını tələb edəndə, bizə avtobusların qrafiklə işlədiyi bildirilir. Hətta bəzi hallarda minnətlə deyirlər ki, xoşun gəlmir, taksi ilə get.
Mən 7 ildir həmin məktəbdə işləyirəm və problemlə həmin vaxtdan bəri hər gün üzləşirəm. Bir dəfə sakinlərdən biri aidiyyəti quruma zəng edib şikayət etmişdi, həmin sürücü ilə bağlı tədbir görüldü. Lakin problem kökündən həll edilmədi”.
İzləyicimiz əlavə edib ki, nəqliyyat vasitələri köhnədir və dəyişdirilməsinə ehtiyac var. O, sözügedən çətinliyin aradan qaldırılması istiqamətində müvafiq addımların atılmasını istəyir.
