Gəncədə bir sıra ərazilərdə lüklər sakinlər üçün təhlükə yaradır. Bu haqda Gencexeber.az-a 17 iyul tarixində məlumat daxil olub.
Söhbət şəhərin Cavad bəy Rəfibəyli (keçmiş Eminbəyli), Səməd Vurğun küçələri, “Komandirin küçəsi” adlanan ərazi və İsrafil Məmmədov küçəsi ilə Atatürk prospektinin kəsişməsindən gedir.
Cavad bəy Rəfibəyli küçəsində avtomobil yolunda yerləşən lük qapaqsızdır. Quyunun yanına dəmir parçası qoyulub. Eyni küçədə piyada səkisində yerləşən iki lükün üzərinə isə yol örtüyündən hündür beton parçaları yerləşdirilib.
Səməd Vurğun küçəsi və “Komandirin küçəsi” ərazisində də quyuların üstü açıqdır. Hər ikisi avtomobil yolunda yerləşir. İsrafil Məmmədov küçəsi ilə Atatürk prospektinin kəsişməsində isə artezian quyusunun üstü örtülməyib, yanına isə iki ədəd taxta yeşik qoyulub. Sakinlər bildirirlər ki, quyunun diametri vaxt keçdikcə böyüyür.
Quyuların bu vəziyyəti həm sürücü, həm də piyadaları narahat edir. Onlar quyuların üstünün qısa müddətdə örtülməsini arzu edirlər.
[modula id="40855"]
