Gəncədə müşavirə keçirilib. Bu haqda 4 oktyabr tarixində Ədliyyə Nazirliyinə istinadən məlumat veririk.
Seminar-müşavirə Ədliyyə Nazirliyi Bələdiyyələrlə İş Mərkəzi tərəfindən Gəncə regional ədliyyə idarəsi ilə birgə təşkil olunub. Burada ərazi yurisdiksiyasına aid bələdiyyə üzv və qulluqçuları iştirak ediblər.
Tədbirdə regional ədliyyə idarəsinin rəisi İlkin Nəcəfov, idarənin və Bələdiyyələrlə İş Mərkəzinin məsul işçiləri tərəfindən çıxışlar olub. Müşavirədə həyata keçirilən tədbirlər barədə məlumat verilib, müzakirələr aparılıb.
Bələdiyyələrlə iş portalının tətbiqi, bələdiyyə torpaqlarının idarə olunması ilə bağlı qanunvericilikdəki yeniliklər, qeyri-yaşayış təyinatlı bəzi tikinti obyektlərinin istismara icazə verilməsi ilə bağlı əlavə tədbirlər haqqında Prezidentin Fərmanının icrası üzrə bələdiyyələrin üzərinə düşən vəzifələr haqda danışılıb. Həmçinin yerli vergilərin toplanmasının artırılması ilə bağlı görülən tədbirlərin nəticələri və qarşıda duran vəzifələr diqqətə çatdırılıb.
