Gəncədə yol hərəkəti qaydalarını pozan şəxslər aşkar ediliblər. Bu haqda 31 iyul tarixində Report-a istinadən məlumat veririk.
Dövlət Yol Polis Şöbəsinin əməkdaşları tərəfindən tədbirlər həyata keçirilib. Nəticədə şəhər ərazisində yol hərəkəti qaydalarını kobud şəkildə pozaraq digər sürücülərə təhlükə yaradan, cəmiyyətə açıqca hörmətsizlik edən bir qrup sürücü saxlanılıb.
Araşdırmalarla polis əməkdaşları tərəfindən tutulan şəhər sakinləri Cahad Əlizadə, Fərid Quliyev, Zaur Cabbarzadə və Elvin Qasımovun müxtəlif vaxtlarda şəhərin bəlli küçə və yollarında avtoxuliqanlıq etmələri məlum olub.
“Mercedes”, “BMW” və “VAZ 21074” markalı avtomobilləri idarə edərək yollarda intizamsızlıq edən, yol hərəkəti qaydalarını kobud şəkildə pozan bu şəxslər barəsində inzibati protokollar tərtib edilib. İşlər baxılması üçün məhkəməyə göndərilib.
Hakimin qərarı ilə Z.Cabbarzadə və E.Qasımov 15 sutka inzibati qaydada həbs edilib, digər sürücülər barəsində isə digər tənbeh tədbirləri seçilib.
