Gəncə avtovağzalında sakinləri narahat edən məsələ var. Bu haqda 18 iyul tarixində ATV-yə istinadən məlumat veririk.
Avtovağzalda dayanacaqların olmaması sərnişinlər üçün çətinlik yaradır. Onlar müxtəlif hava şəraitində çöldə gözləməli olurlar. Bundan başqa, dayanacaqların olmaması səbəbindən burada məlumatverici lövhələr quraşdırılmayıb. Bildirilir ki, bu vəziyyət sürücüləri də narahat edir.
“Günün istisində, yağışda, küləkdə çöldə gözləyirik. Dayanacaqlar olsa, orada durardıq, başımıza gün vurmazdı, yağışda islanmazdıq. Hansı nəqliyyat vasitəsinin hansı istiqamətə gedəcəyindən də xəbərsiz oluruq”, - deyə sərnişinlər bildirirlər.
Məsələ ilə bağlı İcra Hakimiyyəti açıqlama verib. Qeyd olunub ki, dayanacaqların qoyulması üçün sərnişindaşıma ilə məşğul olan fərdi və hüquqi şəxslər Yerüstü Nəqliyyat Agentliyinə müraciət edərək rəy almalı, sonra şəhər İH-də onu təsdiqlətməlidirlər. Növbəti mərhələdə müəyyən olunmuş yerdə qurum tərəfindən dayanacaq yerləşdirilə bilər.
Yerüstü Nəqliyyat Agentliyi Gəncə Regional Nəqliyyat İdarəsindən isə bildirilib ki, avtovağzalın içərisində nəqliyyat qovşağının yaradılması, yerlərin xətlənməsi, perronların quraşdırılması, marşrut avtobuslarının çıxış nöqtəsi haqda avtovağzal rəhbərliyinə lazımi layihələr təqdim olunub. Qoyulan tələblər zamanla yerinə yetiriləcək.
