Gəncədə sosial aksiya baş tutub. Bu haqda 16 iyul tarixində İcra Hakimiyyətinə istinadən məlumat veririk.
Könüllü qanvermə aksiyası Aşura günü ilə əlaqədar “İmamzadə” Məscid-Ziyarətgah Kompleksində keçirilib. Burada icra başçısı Niyazi Bayramov, YAP Gəncə Şəhər Təşkilatının sədri Bayram Aslanov, Qafqaz Müsəlmanları İdarəsinin Qazılar Şurasının üzvü Hacı Tahir Abbasov, İcra Hakimiyyəti başçısı Aparatının məsul əməkdaşları, bələdiyyə sədrləri, idarə, müəssisə, təşkilat rəhbərləri və ictimaiyyət nümayəndələri iştirak ediblər.
Aksiya zamanı həkim-hematoloqlar tərəfindən hər bir donorun sağlamlıq imkanları əvvəlcədən müəyyənləşdirilib. Hərtərəfli tibbi müayinədən sonra onlardan qan götürülüb. Toplanan qan ehtiyatı yoxlanılaraq talassemiya, hemofiliya və leykoz xəstəliyindən əziyyət çəkən şəxslər üçün istifadə olunacaq.
Qeyd edək ki, qan vermək istəyən şəxslər növbəti 40 gün ərzində də Mərkəzi Qan Bankının Gəncə Bölməsinə yaxınlaşa bilərlər. Ünvan: Sabir Hacıyev küçəsi, 2.
