Gəncədə hüquq təhsilinin verilməsi təklif olunub. Bu haqda 26 aprel tarixində Gancapost-a istinadən məlumat veririk.
Vəkillər Kollegiyasının sədri Anar Bağırov jurnalistlərə açıqlamasında bildirib ki, ölkəmiz hüquqşünasların sayına görə regionda xeyli geridədir. Bu səbəbdən o, Gəncə Dövlət Universiteti və digər Bakıdan kənar yerləşən ali təhsil müəssisələrində hüquq fakültəsinin yaradılmasını istədiyini bildirib.
“Qonşu ölkələrdə hüquqşünas məzunların sayı Azərbaycanla müqayisədə bir neçə dəfə çoxdur. Bu, Hüquq fakültələrinin sayının və ixtisas üzrə plan yerlərinin az olması ilə bağlıdır. Hesab edirəm ki, Hüquq fakültəsinə qəbul üçün plan yerlərinin sayı artırılmalıdır. Bakı ilə yanaşı, bölgələrdə də həmin fakültə yaradılmalıdır. Çünki bu gün o ixtisas yalnız Bakıda və Naxçıvan Dövlət Universitetində var. Respublikanın digər bölgələrindəki ali məktəblərdə isə yoxdur. Yaxşı olar ki, Gəncə Dövlət Universitetində, Sumqayıt Dövlət Universitetində, Qarabağ Universitetində də Hüquq fakültələri fəaliyyət göstərsin. Vəkillər Kollegiyası olaraq, biz regionalarda keyfiyyətli hüquqşünas kadrların yetişdirilməsini arzulayırıq”, - deyə Bağırov qeyd edib.
