Azərbaycanın aparıcı aqrar və qida şirkətlər qrupundan birinin rəhbərliyi Gəncəyə səfər edib. Bu haqda 17 avqust tarixində ADAU-ya istinadən xəbər veririk.
Aqrar şirkətlər qrupu olan “Agro Food İnvestments” MMC-nin rəhbəri Vahid Novruzov və nümayəndə heyəti Azərbaycan Dövlət Aqrar Universitetinə baş çəkib. Təhsil ocağının rektoru Zəfər Qurbanov qonaqlara ali təhsil müəssisəsinin yerli və beynəlxalq aqrar şirkətlərlə əməkdaşlığa xüsusi önəm verdiyini bildirib. Rektor gələcəkdə dayanıqlı kənd təsərrüfatı mütəxəssislərinin yetişdirilməsində universitet-sənaye əməkdaşlığının vacib rol oynadığını vurğulayıb.
Görüşdə təcrübə məsələləri, əməkdaşlığın genişləndirilməsi və perspektivləri müzakirə edilib. Qonaqlar universitetin müasir laboratoriyaları, Gəncə Dövlət Aqrar Kolleci, açıq balıq yetişdirmə laboratoriyası, istixana təsərrüfatı və Biotexnologiya mərkəzi ilə tanış olub.
