Gəncədə yay semestri təşkil olunacaq. Bu haqda 15 iyul tarixində ADAU-ya istinadən məlumat veririk.
Azərbaycan Dövlət Aqrar Universitetində yay semestrinə qeydiyyat başlayıb. Dərslər könüllülük prinsipi ilə ödənişli əsaslarla aşağıdakı məqsədlə təşkil olunur:
- Akademik borcların ləğv edilməsi;
- Fənlərin prerekvizitliyi gözlənilməklə humanitar fənlər bölümünə daxil olan və ali təhsil müəssisəsi və AMEA tərəfindən müəyyən edilən seçmə fənlərin kreditlərinin qazanılması;
- Müvəffəq qiymət alınmış fənn üzrə qiymətin yüksəldilməsi;
- Ali təhsil müəssisəsinin təklif etdiyi ayrı-ayrı fənlər üzrə digər ali təhsil müəssisəsi tələbələrinə müvafiq kreditlər qazanmasına şəraitin yaradılması.
Yay semestrində tələbənin götürdüyü fənlər üzrə kreditin ümumi həcmi 10-dan artıq olmamalıdır. Qaydaların tələblərinə uyğun olaraq, imtahana buraxılmayan tələbə semestrdə fənn (fənlər) üzrə müəyyən edilmiş dərslərin 50 faizindən çoxunda iştirak etdiyi halda o, həmin fəndən (fənlərdən) yay semestrində iştirak etmək hüququna malikdir.
Dərslərin müddəti əyani təhsildə 6, qiyabidə isə 3 həftədir. Yay semestrində iştirak etmək istəyən tələbələr 18 iyuladək ərizə ilə dekanlığa və akademik məsləhətçiyə (tyutora) müraciət etməlidirlər.
Qeyd edək ki, yay semestrində 24 iyul – 19 avqust tarixləri nəzəri təlim, 21-26 avqust isə imtahanlar dövrüdür.
