1139-cu ildə Gəncədə baş verən zəlzələ nəticəsində Kəpəz dağı uçaraq Ağsu çayının qarşısını kəsib.
Gencexeber.az məlumat verir ki, bunun nəticəsində ən böyüyü Göygöl olmaqla 7 böyük və onlarla fərqli göllər şəbəkəsi meydana gəlib. Onlardan biri də Güzgügöldür.
Güzgügöl iki hövzədən ibarətdir. Birinci hövzənin sahəsi 1 hektar, dərinliyi isə 6-8 metrdir. Qayalıq ərazidə dərinliyi 10 metrdən 16 metrə qədərdir. İkinci hövzə meşəliyin arasında yerləşir, gün işığı düşdüyü zaman parıldayır. Gölün dibində olan bütün daşlar görünür və buraya atılan əşya 5-6 dəfə böyüyür. Bu səbəbdən də gölə Güzgügöl adı verilib.
Güzgügölü Yeni Zelandiyada yerləşən Metison gölünə bənzədirlər.
Bundan başqa, burada Maralgöl, Qaragöl, Zəligöl, Ağgöl, Şamlıgöl və başqa irili-xırdalı göllər də var. Bu göllər Göygöl Milli Parkının ərazisinə daxildir. Milli Parkın ərazisinin 101 hektarını göllər tutur.
