"Havaların yağıntılı keçməsi çoxillik müşahidələrlə müqayisədə bir qədər artıqdır"
Bu sözləri iqtisadiyyat.аz-a açıqlamasında Ekologiya və Təbii Sərvətlər Nazirliyi yanında İctimai Şuranın üzvü, ətraf mühit məsələləri üzrə ekspert Rövşən Abbasov deyib.
Yağıntının miqdarının normanı bir neçə dəfə üstələdiyini söyləyən ekoloq vurğulayıb ki, bununla belə, mövcud vəziyyəti müəyyən qədər təbii hesab etmək olar.
Mütəxəssis xatırladıb ki, Azərbaycanda tarixən yağıntılı hava şəraiti müşahidə olunub: "Məsələn, 1969, 1995, 2010-cu illərdə, eləcə də daha əvvəllər - 1914-15-ci illərdə ölkədə və regionda güclü yağıntılar və daşqınlar baş verib. Bu cür hadisələr zaman-zaman təkrarlanır və bu, meteoroloji qanunauyğunluq sayılır".
Ekoloq qeyd edib ki, bitkilərin vegetasiya dövründə, xüsusilə may ayından sonra aran rayonlarında intensiv yağıntıların davam etməsi kənd təsərrüfatı bitkilərinə, meyvə-tərəvəzə və taxıl istehsalına mənfi təsir göstərir:
"Dolu yağması isə daha çox dənli bitkilərin məhsuldarlığının azalmasına və çiçəklərin tökülməsinə səbəb olur. Belə halların təsirini minimuma endirmək üçün düzgün proqnozlaşdırma və qabaqlayıcı tədbirlərin görülməsi vacibdir".
