Xəbər verdiyimiz kimi, Gəncə şəhər 37 nömrəli tam orta məktəb aylardır təmir edilmir. Uşaqlar sentyabrın 15-i yeni tədris ilinə uyğun olaraq dərslərə cəlb olunsalar da, cəmi iki həftə sonra yararsız vəziyyətdə olmayan məktəbin binası təmirə dayanıb.
Gəncə-Daşkəsən Regional Təhsil İdarəsindən Gencexeber.az-ın sorğusuna cavab olaraq bildirilib ki, 37 nömrəli tam orta məktəbdə 2024-cü ilin oktyabr ayından etibarən əsaslı təmir və bərpa işlərinə start verilib. Lakin redaksiyamıza təqdim edilən görüntülərdən aydın olur ki, iş məktəb binasında yalnız söküntü ilə məhdudlaşıb və bunu, təbii ki, “əsaslı təmir və bərpa işləri” adlandırmaq olmaz.
“Proses mərhələli şəkildə və təmir-tikinti planına uyğun olaraq icra edilir” – qurum əlavə edib. Bu sözlərdən anlaşılan budur ki, valideynlərə beş ay öncə məktəbin mart ayında hazır olması ilə bağlı verilən vədlər yerinə yetirilməyib.
Gəncə-Daşkəsən Regional Təhsil İdarəsindən bildirilib ki, məktəbin yalnız növbəti tədris ilində istifadəyə verilməsi planlaşdırılıb.
Məsələnin bir başqa problemli tərəfi: şikayətçilərin sözlərinə görə, övladları yaxınlıqda olan 26 nömrəli məktəb-lisey kompleksinə deyil, aralıda yerləşən 3 və 40 nömrəli tam orta məktəblər arasında bölüşdürülüblər. Beləliklə, valideynlər övladlarını təhsil ardınca göndərmək üçün onların nəqliyyat xərclərini əhəmiyyətli dərəcədə artırmaq məcburiyyətində qalacaqlar. Bu isə, xüsusilə qış mövsümündə kommunal ödənişlərin artması ilə üzləşən ailələr üçün əlavə maliyyə itkilərinə səbəb olacaq.
