Gəncəli idmançı çempion olduqdan sonra ilk təəssüratlarını paylaşıb. Bu haqda 30 aprel tarixində Şahmat Federasiyasına istinadən məlumat veririk.
Ötən gün Nizami yurdunun yetirməsi Ülviyyə Fətəliyevanın qadınlar arasında şahmat üzrə Avropa Çempionatının qalibi olması barədə xəbər paylaşmışdıq. 27 yaşlı qrosmeyster Şahmat Federasiyasının Mətbuat Xidmətinə danışıb.
“İnanın, sevincimi sözlə izah etməkdə çətinlik çəkirəm. Çox sevinirəm. Məşqlərin nəticəsini gördüyümüzə görə çox şadam. Qitə çempionatı zamanı mənə dəstək olan bütün insanlara təşəkkür etmək istərdim. Avropa çempionatı çox gərgin keçdi. Həyəcansız oyunlar olmadı, hər tur müəyyən qədər həyəcan hiss olunurdu”, - deyə o qeyd edib.
Şahmatçımiz bildirib ki, hisslərə imkan verməməyə çalışıb. Çünki bir səhv arzusunun həyata keçməsinə mane ola bilərdi.
“Qitə yarışında uğurlu çıxış etməyimdə gərgin məşqlərin rolu böyükdür. Dəstək olan bütün məşqçilərə təşəkkür edirəm. Mənimlə çalışan məşqçi Yevgeni Tomaşevskinin adını çəkməyə bilmərəm. Və əlbəttə, Azərbaycan Şahmat Federasiyasının prezidenti Mahir Məmmədova minnətdaram. AŞF rəhbərliyi mütəmadi olaraq, hazırlığımızla maraqlanır, təcrübəli məşqçiləri işə cəlb edir. Onların ümidini doğrultduğum üçün şadam", - deyə o əlavə edib.
