"Mən indi Kiyevdə yaşayıram. Əlbəttə ki, müharibənin nəticələri hiss olunur".
Bunu Ukrayna qadın güləş millisinin üzvü əslən azərbaycanlı Aida Kərimova prosport.az-a müsahibəsində deyib.
Həmin müsahibəni təqdim edirik:
– Serbiya sizin üçün sevimli ölkə olmalıdır. 2024-cü ildə U-20-lərin Avropa çempionatının qalibi olmuşdunuz. Ötən il U-23-lərdə dünya çempionatının bürünc medalını qazanmışdınız. Yenə oradan əliboş geri qayıtmadınız...
– Serbiya idman tədbirləri baxımından mənim üçün çox qonaqpərvər yer olub. Oradakı atmosfer gözəldir. Artıq 3-cü ildir ki, bu ölkədən vətənə medallar gətirirəm.
– Hazırda hansı şəhərdə yaşayırsınız? Yaşadığınız şəhərdə müharibəni hiss edirsiniz?
– Mən indi Kiyevdə yaşayıram. Əlbəttə ki, müharibənin nəticələri hiss olunur. Baş verənlərə göz yummaq mümkün deyil. Gündəlik həyatımıza təsirsiz ötüşmür. Amma biz bu vəziyyətə uyğunlaşmağa çalışırıq.
– Belə ağır şəraitdə məşq etmək çətindirmi?
– Əlbəttə, belə şəraitdə məşq etmək çətindir. Biz təkcə fiziki deyil, həm də əqli cəhətdən güclü olmağı öyrənirik.
– Atanız Azərbaycanın hansı bölgəsindəndir?
– Atam yevlaxlıdır, Aşağı Qarxun kəndindəndir. Yevlaxda qohumlarımız var. Məsafəyə baxmayaraq, əlaqə saxlayırıq.
– Azərbaycan güləşini necə qiymətləndirirsiniz?
– Azərbaycan güləş məktəbi dünyanın ən güclülərindən biridir. İdmançıların fərdi keyfiyyətləri yüksəkdir.
