Göygöldə təşkil edilən toy məclisində dava düşüb.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsində keçirilib.
Belə ki, təqsirləndirilən 2007-ci il təvəllüdlü Qabil Əliyev (ad şərtidir) Şəmkir rayonunda anadan olub. O, ötən ilin yanvar ayında Göygöl rayonunda yerləşən şadlıq sarayında qohumunun toy məclisində iştirak edib. Şadlıq sarayının digər zalında baş tutan məclisin iştirakçısı, 2009-cu il təvəllüdlü Əli Səmədov (ad şərtidir) toyda itirdiyi qızıl boyunbağını axtarmaq üçün Qabil Əliyevin olduğu zala gəlib. Qabil başqa bir adamın zala daxil olduğunu görərək ona yaxınlaşıb. Oğlan itirdiyi qızılı axtardığını desə də, Qabil ona inanmayıb. Əlinin guya onun qadın qohumlarına baxmaq üçün gəldiyini hesab edib. Buna görə Əlini çölə çıxararaq amansızca döyüb.
Nəticədə Qabil Əliyev Azərbaycan Respublikası CM-nin 126.2.3, 126.2.4 və 221.1-ci maddələri ilə təqsirləndirilib.
Məhkəmədə təqsirləndirilən şəxs qismində dindirilən Qabil Əliyev özünü təqsirli bilməyib. İfadəsində göstərib:
“Qohumumuzun toyunda iştirak etmək üçün Göygöldə yerləşən şadlıq sarayına getdik. Anamgil çölə çıxan zaman olduğumuz zala 3 nəfər kənar şəxs daxil oldu. Onlardan burada nə etdiklərini soruşanda boyunbağı axtardıqlarını dedilər. “İtmiş boyunbağınız bizim olduğumuz zalda nə gəzir?!” dedim. Əli qolumdan tutub çölə çıxardıb, onu gözləməyimi dedi. Ayağımda yara olduğu üçün gözləyə bilməyib restorana geri qayıtdım. Arxamca onun qardaşı məni çağırıb Əlinin həyətdə məni axtardığını dedi. Əli məni görən kimi üstümə cumub təpik atdı. Çəkildiyim üçün ayağı boşa gedərək işıq dirəyinə çırpıldı. Nəticədə burnundan qan açıldı.
10-15 gün sonra polislər anamı və məni idarəyə çağırdılar. Buna səbəb guya mənim Əlini döyməyim və öldürməklə hədələməyim olub. Hamısı yalandır. Mən ona heç bir xəsarət yetirməmişəm”.
Məhkəmədə qanuni nümayəndənin iştirakı ilə dindirilmiş zərərçəkmiş Əli Səmədov deyib:
“Aramızda başlanan davanın səbəbi Qabil olub. Boyunbağını axtaran zaman Qabil qarşımıza çıxaraq nə etdiyimizi soruşdu. İtmiş əşyamızı axtardığımızı desəm də, inanmadı. Əlində siqaret “yalan deyirsiz. Ana-bacımıza baxmağa gəlmisiz” dedi. Daha sonra kənara çəkib “ağıllı ol, biz şəmkirliyik, bizi polislər belə tanıyır” ifadəsini işlətdi. Ardınca başımı qoltuğuna alıb, əlindəki əşya ilə öncə başıma, sonra üzümə neçə dəfə vurdu”.
Sonda məhkəmənin qərarı ilə Qabil Əliyev 6 il 6 ay müddətində azadlıqdan məhrum edilib. O, cəzasını ümumi rejimli islah müəssisəsində çəkəcək.
Fidan İlqar
