Gəncə şəhər 3 nömrəli Təxirəsalınmaz Təcili Tibbi Yardım Xəstəxanasının Təcili yardım şöbəsinin palatalarında pişiklərin məskunlaşması ilə bağlı vətəndaşların narazılığına Tibbi Ərazi Bölmələrini İdarəetmə Birliyindən (TƏBİB) aydınlıq gətirib.
Qurumdan Gencexeber.az-a bildirilib ki, Akademik Zülfüqar Məmmədov adına xəstəxananın (Gəncə şəhər 3 nömrəli xəstəxana) həyətyanı sahəsinin geniş olması səbəbindən ərazidə bir neçə sahibsiz heyvanın, o cümlədən it və pişiklərin olması faktı mövcuddur. Habelə bununla bağlı aidiyyəti qurumlara məlumat verilsə də, indiyədək müvafiq tədbir görülməyib:
"Son günlər hava şəraitinin pisləşməsi ilə əlaqədar sahibsiz pişiklərdən biri yeni doğulmuş balalarını qorumaq instinkti ilə onları xəstəxananın Təcili tibbi yardım şöbəsinin palatasına keçirib".
Məlumata görə, xəstəxana personalı vəziyyətə dərhal müdaxilə edib və heyvanlar şöbədən kənarlaşdırılıb.
Hazırda tibb müəssisəsinin palatalarında heç bir pişik və ya digər heyvanın olmadığı, hadisə ilə əlaqədar sanitar-gigiyenik tələblərə uyğun olaraq palatada növbədənkənar dezinfeksiya işlərinin aparıldığı bildirilib.
Qeyd edək ki, daha əvvəl redaksiyamıza müraciət edən şəhər sakini yaxınını xəstəxanaya gətirərkən palatalardan birində pişiklərin çarpayıların altında yuva qurduğunu bildirib.
Vətəndaşın sözlərinə görə, pişiklərin otaqdan çıxarılmasını tələb etdikdə həkimlərdən biri bunun mümkün olmadığını və pişiklərin çıxarılmasının "günah" olduğunu deyib.
