Gəncə şəhər 3 nömrəli xəstəxanasının Təcili yardım şöbəsinin palatalarında pişiklərin məskunlaşması narazılığa səbəb olub.
Gencexeber.az-a müraciət edən şəhər sakini bildirib ki, yaxınını xəstəxanaya gətirərkən palatalardan birində xoşagəlməz mənzərə ilə qarşılaşıb.
"Bu hadisə məni şoka saldı. 3 nömrəli xəstəxanaya anamla bağlı Təcili yardım şöbəsinə getmişdik. Orada çarpayıların altında pişiklər özlərinə yuva qurmuşdular", – sakin bildirib.
Onun sözlərinə görə, pişiklərin otaqdan çıxarılması tələb edildikdə bunun mümkün olmadığı bildirilib:
"Həkimlər bir ağızdan dedilər ki, pişikləri çıxara bilmərik, günahdır. Amma bura xəstəxanadır. Burada sanitar və gigiyenik qaydalara riayət olunmalıdır".
Sakin xəstəxananın ərazisində bu cür halların aradan qaldırılmasının vacibliyini vurğulayıb və aidiyyəti qurumları məsələyə diqqət yetirməyə çağırıb.
Məsələ ilə bağlı redaksiyamız tərəfindən Tibbi Ərazi Bölmələrini İdarəetmə Birliyinə (TƏBİB) sorğu ünvanlanıb.
