Türkiyədən bir qrup nümayəndə Gəncəyə səfər edib. Bu haqda 5 oktyabr tarixində ADAU-ya istinadən xəbər veririk.
Yurdumuza Türkiyə Cümhuriyyəti Kənd Təsərrüfatı Sığortası Hovuzunun (TARSİM) nümayəndələri gəliblər. Onlar öncə “Qələbə” parkının yaxınlığında raket atəşinə tutulması nəticəsində dağılan ərazini ziyarət edib və ətrafına gül düzüblər. Daha sonra qonaqlar Türkiyənin şəhərimizdəki Konsulluğuna baş çəkiblər. Onlar baş konsul Rəcəp Öztop ilə görüşüblər.
Daha sonra Azərbaycan Dövlət Aqrar Universitetində Aqrar Sığorta Fondu ilə birgə “Türkiyə və Azərbaycan aqrar sığorta sistemlərinin təqdimatı” mövzusunda tədbir keçirilib. Burada iştirak edən TARSİM nümayəndələri aqrar sığorta mexanizminin tətbiqinin Türkiyənin kənd təsərrüfatının inkişafına təsiri barədə məlumat veriblər.
Tədbirdə ADAU-nun nümayəndələri Zəfər Qurbanov, Məhərrəm Hüseynov, Aqrar Sığorta Fondunun əməkdaşları Fuad Sadıqov və Əli Əhmədov çıxış edərək Türkiyə və Azərbaycan arasında təcrübə mübadiləsi və Azərbaycan təcrübəsinin başqa ölkələrdə tətbiqi, aqrar kadrların səmərəli bacarıqlarının reallaşdırılması və digər mövzularda danışıblar.
