Gəncədə nəşr olunan kitab Türkiyədə kitabxanaya bağışlanıb. Bu haqda 6 yanvar tarixində Azərtac-a istinadən məlumat veririk.
AMEA-nın Gəncə Bölməsinin əməkdaşları tərəfindən ərsəyə gətirilən və “Elm” nəşriyyatında çapdan çıxmış “Türkiyə-Azərbaycan əbədi amal birliyinin Gəncə səhifələri” adlı araşdırmanın türk dilində də buraxılmış variantı qardaş ölkənin paytaxtında yerləşən Millət Kitabxanasına hədiyyə olunub. Kitabları həmin maarif ocağına 2018-2022-ci illərdə Türkiyənin Gəncədəki Baş konsulu vəzifəsində çalışmış Zeki Öztürk çatdırıb.
O, əsərin həm Azərbaycan, həm də türk dillərində nəşr olunmuş variantları üçün “Ön söz” də yazıb. Öztürk kitabları Millət Kitabxanasına təqdim edərkən bu araşdırmanı Gəncənin ən böyük elm ocağının alimlərinin Türkiyə-Azərbaycan qardaşlığına töhfəsi olduğunu bildirib.
Qeyd edək ki, Türkiyə Prezidenti yanında Millət Kitabxanası qardaş ölkənin ən böyük kitabxanasıdır. Burada dünyanın 134 dilində 4 milyondan çox kitab və 120 milyondan çox məqalə və digər materiallar saxlanılır.
