Gəncədə tibbi konfrans keçirilib. Bu haqda 19 iyul tarixində TƏBİB-yə istinadən məlumat veririk.
TƏBİB-nin İcraçı direktorunun müavini, komissiyanın sədri Anar İsrafilov, İlkin Səhiyyə və Təcili Yardım Departamentinin rəhbəri Anar Ağayev və digər üzvlər Gəncə Regional Perinatal Mərkəzini ziyarət ediblər. Burada analara və yenidoğulmuşlara göstərilən tibbi xidmətin, infeksiyaların profilaktikası və infeksion nəzarət (İPİN) qaydalarının tətbiqinin, qadın və reproduktiv sağlamlığın qorunmasına yönəlmiş tədbirlərin həyata keçirilməsinin, yenidoğulmuşlara göstərilən reanimasion xidmətin, müəssisədə keyfiyyətə nəzarət işinin, kritik durumda daxil olan hamilələrə göstərilən tibbi xidmətin təşkilinin dəyərləndirilməsi aparılıb.
Daha sonra Gəncə Şəhər Birləşmiş Xəstəxanasında Samux, Naftalan, Daşkəsən, Göygöl, Goranboy rayonlarının tibb müəssisələrindən aidiyyəti işçilərin iştirakı ilə videoformatda konfrans keçirilib. Tədbirdə cari ilin ilk 6 ayında TƏBİB üzrə göstərilən antenatal və doğuşayardım xidmətinin müqayisəli nəticələri barədə ətraflı məlumat təqdim edilib. Burada Anar Ağayev, Ana və uşaq sağlamlığı şöbəsinin müdiri Sevinc Məmmədova, şöbənin böyük məsləhətçisi Şəbnəm Şahgəldiyeva, Doğuşayardım komissiyasının sədri Təranə Rəcəbli, Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva və başqalarının çıxışları baş tutub.
Tədbirin sonunda doğuşayardım xidməti üzrə mövcud əmr və sərəncamların, təlimat və protokolların icrasına nəzarətin, həmçinin antenatal və doğuşayardım işinin gücləndirilməsi məqsədilə bu sahədə müntəzəm olaraq görüşlərin keçirilməsi barədə müəssisə rəhbərlərinə tapşırıqlar verilib.
