“Özüm üçün yazdığım mahnıların sayı çoxdur. Zamanla hər birini təqdim edəcəm”.
Bu sözləri Gencexeber.az-ın müsahibi müğənni Cavid Məmmədov deyib.
Onunla müsahibəni təqdim edirik:
- Cavid bəy, öncə oxucularımız sizi yaxından tanısın.
- 1992-ci ildə Gəncə şəhərində anadan olmuşam. Musiqi daima mənimlə olub, olacaq da.
- Gəncədə keçirdiyiniz uşaqlıq günlərini xatırlayırsınız?
- Gəncə doğma şəhərim, ən yaxın dostumdur. Təbii ki, hər bir küçəsi, havası, suyu mənə əzizdir. Xatirələrimin sayı tükənməzdir. Ancaq ən çox sevindiyimiz günlər yolların bağlanması olurdu. Çünki yollar bağlanar, asfalt üzərində xətlər təzələnərdi. Həmin zaman Şah İsmayıl Xətai prospekti açıq qalardı. Bizdə uşaqlarla həmən günlər çox sevinər, bütün oyunlarımızı geniş yolda oynayardıq.
- Musiqiyə bağlılığınız necə yarandı? Özünüzü bu sahədə necə gördünüz?
- Uşaqlıqda çəkilən videolarımda görüb anladım ki, danışa bilməyən yaşlarımda belə musiqini hər zaman hiss edirdim. Daha sonra anam məni musiqi məktəbinə, fortepiano sinfinə yazdırdı. Beləliklə, artıq 25 ildir ki, musiqi ilə dostluq edirəm, həyat yolumu onunla addımlayıram.
- Bu yerə gələnə qədər hansı yollardan keçmişiniz?
- 17-18 yaşımdan demək olar ki, musiqiyə çox professional yanaşmağa başladım. İlk böyük səhnəm 2016-cı ildə “Ukraynanın Səsi” oldu. Daha sonra vətənimizdə səhnələr almağa başladım. İncəsənət universitetinə qəbul oldum və estrada vokal üzrə təhsilimi davam etdirdim.
- Bir çox sevilən mahnılarınız var. Onların müəllifi kimdir?
- Mahnılarımın müəllifi özüməm. Bir sıra sevilən mahnılarım var. Özümün ən çox sevdiyim bəstəm isə Xalq artisti Zülfiyyə Xanbabayeva ilə ifa etdiyimiz “İstərdim” ifasıdır.
Məni ən çox tanıdan və “Amerika Top” siyahısına düşən ifam “Ti moya dünya” olub. 2019-cu ildə bir çox ölkələrin “Trend 10” siyasında birinci yerdə idi.
- Çox gözəl vurğuladınız. Həmin dövrlər "Ti moya dünya" mahnısı bir çox videoçarxların fon musiqisinə çevrildi. Maraqlıdır, "Tİ Moya dünya"nın yaranma hekayəsi necə olub?
- “Ti moya dünya” mahnısının yaranması sadədir. Ragheb Alamanın “Nassini el Donia” mahnısına rus dilində sözlər yazdım və daha fərqli auditoriya qarşısına çıxartdım. Bu mahnı mənim ifamda xüsusi sevildi. Bir çox ölkələrdə top trend listlərdə aylarca qaldı.
- Bəs ilk ifa etdiyiniz mahnı hansı olub?
- İlk yazdığım və ifa etdiyim mahnı “İkinci nəfəs” ifası olub. Dediyim kimi, ilk gündən mahnıların müəllifi özüm olmuşam.
- Özünüzü hansı janrda daha rahat hiss edirsiniz? Ən sevdiyiniz hansıdır?
- Ən sevdiyim janr pop, R&B və cazdır. Ancaq özüm daha çox pop janrında ifa edirəm. Çünki bu janrda özümü daha rahat hiss edirəm.
- Sizi ən çox ilhamlandıran sənətçilər kimlərdir — yerli və ya xarici?
- Yerli ifaçılardan ilham alacağım heç kəs yoxdur. Bir tək bəstəkar İsmayıl Əsədovun adını çəkə bilərəm ki, bu insanın bəstələri ruhuma çox yaxındır.
- Əməkdaşlıq etmək istədiyiniz bir ifaçı və ya bəstəkar varmı?
- Özüm üçün yazdığım mahnıların sayı çoxdur. Ona görə ehtiyac duymuram. Zamanla hər birini təqdim edəcəm.
- Qarşıda hansı layihələriniz var? Yeni mahnılar, kliplər və ya konsertlər gözlənilirmi?
- Konsert qiymətləri o qədər fantastik olub ki, sponsorsuz çətin məsələ hesab edirəm. Bəlkə konsert vermək nə zamansa mümkün oldu. Buna inanıram, olacaq.
Doğma Gəncəm üçün mahnım var. Yaxın günlərdə təqdim edəcəm.
- Sonda gənc musiqiçilərə nə tövsiyə edərdiniz?
- Gənclərə tövsiyəm odur ki, mütləq sənətlə bərabər toy biznesində olsunlar. Səviyyəni qoruyub saxlamaq şərti ilə pul qazansınlar. O zaman həm şəxsi həyatlarında, həm də karyeralarında hər şey əla olacaq.
Fidan İlqar
