Hüquqşünas və bəstəkar kimi iki zidd sahədə uğur qazanan, mahnıları hələ də müxtəlif ölkələrdə oxunan Ələkbər Tağıyevin dünyaya gəlməsindən 101 il ötür.
Gencexeber.az xatırladır ki, dahi bəstəkar 1924-cü il aprelin 28-də Gəncədə anadan olub. Altı uşaqlı kasıb ailədə doğulduğu üçün musiqi sahəsində təhsil ala bilmir. Məhkəmədə kuryer işləmək üçün yaşını iki il artırır. Ümumittifaq qiyabi Hüquq İnstitutunu bitirdikdən sonra 36 il prokurorluq orqanlarında çalışır.
1958-ci ildə Ələkbər Tağıyev Göygölü seyr edəndə melodiya zümzümə etməyə başlayır, evə gəlib nota köçürür və Əhməd Bakıxanovla Qənbər Hüseynliyə göstərir. Beləliklə, Ələkbər Tağıyevin ilk mahnısı - “Qonşu qız” yaranır. Mahnının uğurundan həvəslənir, qısa müddətdə “Şirin arzular”, “Sən gəlməz oldun”, “Dinə bilmədim”, “Bakı gecələri”, “Azərbaycanın mənim” və başqa mahnıları bəstələyir.
1962-ci ildə Asəf Zeynallı adına Musiqi texnikumuna daxil olub, bəstəkarlıq biliklərini təkmilləşdirir. Yaradıcılığının ilk dövründə 10 ilə yaxın Zeynəb Xanlarova ilə işləyir. Sonra Nisə Qasımova ilə çalışır.
Bəstəkar işlədiyi müğənnilərə səhnədə necə dayanmağı, hansı hərəkətləri etməyi də öyrədir. Nisə Qasımova və Məmmədbağır Bağırzadənin musiqi və hətta geyim üslubunun formalaşması birbaşa Ələkbər Tağıyevin adı ilə bağlıdır.
Bəzi mahnıları Orta və Yaxın Şərq ölkələrində də oxunur. Bəstəkar “Sən gəlməz oldun” mahnısını qardaşı oğlunun gənc yaşda həyatdan köçən xanımına həsr edir.
Təbiət aşiqi olan bəstəkar çox vaxt Nardarandakı bağında olur, güllər əkir, onlara qulluq edir. 1981-ci il aprelin 16-da bağa yeni güllər əkmək istəyir. Ancaq qəfil halı pisləşir. Oğlunun sözlərinə görə, atası kəlmeyi şəhadətini oxuyub gülə-gülə gözlərini yumdu.
Bəstəkar Ələkbər Tağıyev Maştağada Seyidlər qəbiristanlığında torpağa tapşırılıb.
