Gədəbəy şəhərinin girişində antisanitar vəziyyət müşahidə olunur.
Gencexeber.az-a daxil olan məlumata görə, "R-22 Şəmkir–Gədəbəy" avtomobil yolunun 46-cı kilometrliyində, körpülərin yaxınlığındakı təpəlik ərazilərə kütləvi şəkildə məişət tullantıları atılır. Nəticədə ərazidə xoşagəlməz görüntü və antisanitar vəziyyət yaranır.
Şəhərə daxil olan zaman qarşıya çıxan ilk mənzərənin zibillik olması həm sakinlərin, həm də sürücülərin narazılığına səbəb olur. Bildirilir ki, ərazidən yayılan qoxu vəziyyəti daha da ağırlaşdırır.
Sözügedən görüntülər bu gün, 18 may tarixində Gədəbəy şəhərinin girişində yerləşən körpünün yaxınlığında qeydə alınıb.
Vətəndaşlar aidiyyəti qurumlardan əraziyə nəzarətin artırılmasını, tullantıların daşınaraq təmizlənməsini və problemin qısa müddətdə aradan qaldırılmasını tələb edirlər.
