Aktauda qəzaya uğrayan təyyarədən sağ çıxan Subxonkul Rəhimov Hökümə Əliyevanın şücaətindən danışıb.
Gencexeber.az məlumat verir ki, Aktau yaxınlığında qəzaya uğrayan təyyarədən sağ çıxan 48 yaşlı sərnişin Sübhanqul Rəhimov Rusiyanın “TASS” dövlət xəbər agentliyinə “Azərbaycan Hava Yolları”na məxsus “Embraer 190” təyyarəsinin stüardessası Hökümə Əliyevanın şücaətindən danışıb.
S.Rəhimovun sözlərinə görə, Hökümə kritik məqamda cəsarət nümayiş etdirərək üzərinə düşən vəzifələri mükəmməl şəkildə yerinə yetirməyə davam edib:
“Pilotlara yaxın olan təyyarə bələdçisi (Hökümə Əliyeva) ruhdan düşmürdü, hərçənd ki, vəziyyət bərbad idi, ələlxüsus da qadın üçün. O, vəzifəsinə aid bütün funksiyalarını yerinə yetirirdi.
Çünki onun göstərişi ilə (artıq dediyi sözlər yadımdan da çıxıb)… mən kresloya sıxıldım. O (Hökümə Əliyeva), bütün vəzifələrini yerinə yetirdi. Qadın olaraq üsyan edən kişiləri sakitləşdirməyə və yerlərinə oturtmağa çalışırdı. O, sərnişinlərə əsasən Azərbaycan dilində müraciət edirdi”.
Qeyd edək ki, Hökümə Əliyeva 1991-ci ildə Kəlbəcər rayonunun Susuzluq kəndində dünyaya göz açıb. Ermənistan silah qüvvələrinin I Qarabağ müharibəsi dövründə 1993-cü ildə kəndi işğal etməsi nəticəsində ailəsi ilə birlikdə Bərdə rayonun Qaradəmirçi kəndində müvəqqəti məskunlaşıblar.
1996-cı ildə ailə Rusiyanın Volqoqrad vilayətində köçüb. Hökümə burada 6-cı sinfə qədər təhsil alıb. Daha sonra isə Gəncə şəhərinə köçüblər. Hökümə təhsilini Nizami yurdunda davam etdirib. Gəncə şəhər V.Veysəlov adına 30 nömrəli tam orta məktəbi bitirəndən sonra 612 bal toplayan Hökümə Bakı Dövlət Universitetinin Hüquq fakültəsinə daxil olub. Daha sonra təhsilinin magistr və doktorantura pillələrini də tamamlayıb.
Mərhumun atasının sözlərinə görə, o, 2016-cı ildən AZAL-da əvvəlcə tərcüməçi kimi işə başlayıb, daha sonra stüardessa olaraq çalışıb, yaxın vaxtlarda isə AZAL-da hüquqşünas vəzifəsində işləyəcəkdi. Qadın bildirib ki, bu, onun son uçuşları idi.
