51 yaşlı qadın tələbə olub.
Gencexeber.az Qafqazinfo-ya istinadən məlumat verir ki, bu il tələbə adını qazananlar arasında 1973-cü il təvəllüdlü Həqiqət Salahova da yer alıb. Şəmkir rayonu Düyərli kənd sakini olan xanım Azərbaycan Kooperasiya Universitetinin “Sosial iş” ixtisasına qəbul olub.
O, daha öncə təhsil alsa da bu il yenidən tələbə olmaq qərarına gəlib.
“Öncə Bakı Neft - Energetika Kollecində təhsil aldım. Daha sonra isə Azərbaycan Dövlət Neft Akademiyasına qəbul oldum. Lakin böyük oğlumun dünyaya gəlməsi səbəbilə diplom müdafiəsində iştirak edə bilmədim. Bu, illərlə ürəyimdə qalmışdı. Uzun illər kənddə repetitor kimi fəaliyyət göstərmişəm. Hər iki oğlumun təhsili ilə özüm məşğul olmuşam, onlar da ali təhsil alıblar. Bu il qərar verdim ki, artıq mən də hazırlaşıb sənəd verim. Elə də etdim və qəbul oldum”, - deyə o, qeyd edib.
Həqiqət xanımın sözlərinə görə, qəbul olmaq üçün cəmi bir ay hazırlaşıb. O, 234,8 bal toplayaraq istədiyi ixtisasda oxumaq hüququ qazanıb.
“Sosial şəbəkədə bu sevincimi bölüşdüm, amma mənfi rəylər aldım. Gənclərə demək istərdim ki, heç biri həvəsdən düşməsin. Əgər bu il alınmadısa, yenidən cəhd etsinlər”, - deyə o əlavə edib.
