Gəncə Şəhər Məhkəməsində xuliqanlıqda təqsirləndirilən Zamiq Nəzərovun (adı, soyadı şərtidir) cinayət işi üzrə məhkəmə istintaqı yekunlaşıb.
İttihama əsasən, ötən il Gəncədə Zamiq Nəzərov qardaşı Cabir Nəzərovla (adı, soyadı şərtidir) birlikdə sərxoş vəziyyətdə ictimai qaydanı kobud surətdə pozub.
Bildirilir ki, təqsirləndirilən şəxs zərərçəkmiş Bayram Vəliyevlə (adı, soyadı şərtidir) mübahisə edərək ona yumruq zərbələri vurub.
Məhkəmə iclasında Zamiq Nəzərov özünü qismən təqsirli bilib.
O, ifadəsində zərərçəkmiş Bayram Vəliyevin baldızı oğlu olduğunu deyib.
Məhkəmədə təqsirləndirilən şəxs hazırda zərərçəkmiş şəxslə barışdıqlarını bildirib. O, himayəsində azyaşlı uşaqlarının olmasını və səmimi peşmanlığını nəzərə alaraq barəsində daha yüngül cəza tətbiq edilməsini məhkəmədən xahiş edib.
Hakim Ülkər Babazadənin sədrliyi ilə keçirilən prosesdə hökm oxunub. Məhkəmənin hökmü ilə ona 1 il 11 ay 26 gün müddətinə azadlığın məhdudlaşdırılması cəzası təyin edilib.
