Gəncə sakini oğurluğa görə tutulub. Bu haqda 5 aprel tarixində Qaynarinfo-ya istinadən məlumat veririk.
Hadisə Bakı şəhərinin Nəsimi rayonunda qeydə alınıb. Kərbəlayi Abdullah məscidində oğurluq hadisəsi olub. Hadisəni törətməkdə şübhəli bilinən 39 yaşlı Gəncə şəhər sakini Ziya Tacəddin oğlu (ad şərti) həbs edilib.
Onun sözlərinə görə, oğurluğu törətməzdən öncə maddi imkanının yaxşı olmadığını bildirərək məscidin imamı (axundu) Hacı Malikdən pul istəyib. Həmin vaxt axund seyfdən pul götürərək ona 10 manat verib. Bu səbəbdən Tacəddin seyfdə pul olduğunu bilib və oradan oğurluq etmək qərarına gəlib.
O, 11 sentyabr 2023-cü ildə gecə saat 00:05 radələrində məscidə girib. Burada heç kimin olmamasına əmin olduqdan sonra axund otağının kilidini sındırıb və içəri daxil olub. O, dəmir seyfin kilidini bıçaq vasitəsilə açıb və Hacı Malikə məxsus olan 17 800 Azərbaycan manatı, 525 ABŞ dolları və 700 avro olmaqla ümumilikdə cəmi 20 000 manat pulu oğurlayıb.
Məhkum həmin məbləğin bir hissəsini "Malibu” gecə klubunda əyləncəyə və qızlara xərcləyib. Bir neçə gün sonra isə həbs edilib. O, dəyən ziyanın çox hissəsini qaytarmayıb.
Məhkəmənin qərarı ilə Ziya Tacəddin 3 il 6 ay azadlıqdan məhrum edilib.
