Uğur çalışqanlıq, sistemli hazırlıq, düzgün zaman bölgüsü və əlbəttə, ailənin, məktəbin dəstəyinin nəticəsidir. Gəncə şəhərindəki Fizika, riyaziyyat və informatika təmayüllü liseyin (FRİTL) bir qrup şagirdi buraxılış imtahanlarında göstərdikləri yüksək nəticələrlə bu fikri bir daha təsdiqləyiblər. Onların uğur yolu bir çox məktəblilər üçün həm nümunə, həm də motivasiya mənbəyi ola bilər.
“Azərbaycan müəllimi” hazırlığa getmədən yüksək bal toplayan şagirdlərin fikirlərini öyrənib.
Nihad Rəsulov FRİTL-də 7-ci sinifdən təhsil almağa başlayıb. Martın 9-da keçirilmiş buraxılış imtahanında 295 bal toplayıb. Bu günə kimi heç bir repetitor yanına getməyib:
“Gündəlik ev tapşırıqlarımı yerinə yetirirdim. Zəif olduğum mövzular üzərində çalışırdım. Həm effektiv çalışmaq, həm də imtahan zamanı vaxtı tənzimləyə bilmək üçün taymerdə özümə vaxt qoyub testləri sürətli işləyirdim”.
Elsəf Bağırov 2020-ci ildə yüksək balla FRİTL-ə qəbul olub. Buraxılış imtahanında 298 bal toplayıb. İmtahanlara yalnız məktəbdə keçirilən dərslər, müəllimlərinin köməyi ilə hazırlaşıb:
“Gündəlik həyatımı, yuxu rejimimi də pozmamışdım. Fikrimcə, hazırlıq kursları məsuliyyətsiz uşaqları bir az inkişaf etdirmək üçündür. Əgər bir şagirdin oxumaq üçün həvəsi varsa, repetitorsuz belə imtahana hazırlaşa bilər”.
Leyla Hacızadə buraxılış imtahanında 298 bal toplayıb. Hər gün əzmli və planlı şəkildə çalışaraq məktəbdən verilən tapşırıqları tamamlayıb. Bu il Almaniyada keçiriləcək Avropa Qızlar İnformatika Olimpiadasına (EGOI-2025) ölkəmiz üzrə seçilmiş komandanın 4 qızından biridir.
“Olimpiadalar daha çox əziyyət və səbir tələb edir. Məncə, yaxşı nəticə əldə etmək üçün hazırlığa getməyə ehtiyac yoxdur”, - Leyla deyib.
Ayan Kərimova buraxılış imtahanında 295 bal toplayıb. O da bu il Almaniyada keçiriləcək Avropa Qızlar İnformatika Olimpiadasına (EGOI-2025) ölkəmiz üzrə seçilmiş komandanın tərkibindədir:
“Ölkəmizi təmsil edəcək 4 qızdan biri olmaq mənim üçün qürurvericidir. Təhsilimi kompüter elmləri üzrə davam etdirmək və gələcəkdə bu sahədə yeniliklər yaratmaq istəyirəm”.
