“Azərbaycan teatr rejissorluğu məktəbinin üç əsas sütunu var”.
Bu sözləri Gencexeber.az-ın bugünkü müsahibi Gəncə Dövlət Milli Dram Teatrının baş rejissoru Elşad Əhmədov deyib.
Onunla müsahibəni təqdim edirik:
- Elşad bəy, öncə oxucularımız üçün özünüz təqdim edərdiniz.
- Əhmədov Elşad Eldar oğlu. 1981-ci ildə Gəncə şəhərində anadan olmuşam.
- Teatr sənətini seçməyinizin arxasında hansı səbəblər dayanır? Bu sahəyə olan marağınız necə başladı?
- Teatr sənətinə olan marağım orta məktəb dövründən başlayıb. O zamanlar dram dərnəyinin fəal üzvlərindən olmuşam. Həmin dərnəkdə bədii qiraət müsabiqələrində, Səməd Vurğunun, Şıxəli Qurbanovun, xalq və meydan tamaşalarında iştirak etmişəm. Sonralar, incəsənətin və idmanın müxtəlif sahələrinə maraq göstərmişəm.
- Sizə görə yaxşı bir teatr tamaşası nəyi özündə əks etdirməlidir? Tamaşaçıya nə mesaj vermək lazımdır?
- Bilirsiniz ki, teatr kollektiv bir sənətdir. Hazırlanan hər tamaşa böyük kollektivin zəhmətinin bəhrəsi hesabına başa gəlir və hər tamaşanı yeni bir eksperiment adlandırmaq olar. Yaxşı tamaşa - aktyor (oyunçu) və tamaşaçı arasında enerji mübadiləsinin baş verməsidir.
- Baş rejissor olaraq, aktyorlarla iş prosesini necə qurursunuz? Hər bir aktyorun fərdi yanaşmasına necə uyğunlaşır və onların performansını necə inkişaf etdirirsiniz?
- Baş rejissor - tək aktyorlarla fərdi iş prinsipini özündə əks etdirmir. Eyni zamanda, teatrın bütün bədii yaradıcılıq üslubu, repertuar siyasəti və ümumilikdə teatrın bir neçə illik yol xəritəsini planlaşdıran bir personadır. Şükürlər olsun ki, bu işi Gəncə Dövlət Milli Dram Teatrının direktoru ilə birlikdə həyata keçirə bilirik. Son illərdə GDMDT repertuar siyasəti və eyni zamanda da xarici teatrlarla əlaqələr yüksələn xətt üzrə inkişaf edir.
- Rejissorluğunuzda ən böyük çətinliklər nələr olub və onları necə aşmısınız?
- Hər bir tamaşa yeni bir inkişaf mərhələsidir. İnkişaf varsa, o yolda çətinliklər də olur. Şükürlər olsun ki, bu çətinlikləri aşa bilirik.
-Sizə ən çox ilham verən teatr rejissorları və ya sənətkarlar kimlərdir?
- Dünya teatrlarında baş verən bütün prosesləri izləyirəm. Və kimlərdən ilham aldığım siyahı uzun ola bilər. Çünki hər bir rejissorun öz yaradıcılıq üslubu var. Amma Azərbaycan teatr rejissorluğu məktəbinin üç əsas sütunu var ki, Adil İsgəndərov, Mehdi Məmmədov və Tofiq Kazımov bu gün mənim əsl ilham mənbəyimdir.
- Heç başqa teatra getmək arzunuz olub?
- Sizcə insan öz doğma evini atıb gedə bilərmi? GDMDT mənim doğma evimdir. Mən bu teatrda böyümüşəm. Bu teatrda adı qızıl hərflərlə teatr tariximizə yazılmış sənətkarların əlindən su içmişəm.
- Aktyorlarla rejissor arasında qalmaqal olurmu? Rejissorlar eyni aktyorlarla işləyirlər?
- Yaradıcılıq prosesində hər bir şey ola bilər. Bütün baş verənlər isə gələcəkdəki tamaşanın uğurlu alınması üçündür. Tamaşanın uğurlu alınması isə - TEATRIN uğurudur.
-Teatr, sənət adamlarının narazı olduqları məsələ maaşlarla bağlıdır. Sizin bu barədə fikriniz nədir? Sirr deyilsə, aktyorlarınız nə qədər maaş alırlar?
- Teatr sənəti ilə məşğul olan hər bir şəxs bilir ki, bu peşə heç kimə milyonlar vəd etmir. Bu dünya teatrlarında da belədir. Keçən ilin may ayında cənab prezidentin göstərişi ilə, nazirlər kabinetinin müvafiq qərarına əsasən teatrimıza MİLLİ status verildi. Bu statusun verilməsi teatrda çalışanların həm yaradıcılıq potensialına, həm də sosial rifahının inkişafına böyük stimul oldu. Yəni, işçilərin aylıq əmək haqqları 50% artırıldı. Hazırda teatrımızda əmək haqqı 500-1000 manat arasındadır.
- Teatrınızda nə kimi çatışmazlıqlar var? Orada nədən narazısınız?
- Bildiyiniz kimi, ölkə başçısı cənab İlham Əliyevin müvafiq sərəncamı ilə şəhərimizdə yeni teatr binası inşa edilib. Və yeni inşa olunan bu binada yaradıcılıqla yüksək səviyyədə məşğul olmaq üçün hər bir şərait yaradılıb. Bütün bu yaradılan şəraitə görə cənab Prezidentə və Heydər Əliyev Fondunun prezidenti Mehriban xanım Əliyevaya bütün teatr xadimləri adından dərin minnətdarlığımı bildirirəm.
Fidan İlqar
