Samux məktəblisi olan Arzunun sosial şəbəkədə paylaşılan şəkli “Kitabi-Dədə Qorqud” eposunun qəhrəmanlarından olan Qaraca çobanı xatırladıb.
Muallim.edu.аz samuxlu “Qaraca çoban”ı yaxından tanımaq üçün onunla həmsöhbət olub.
Samux rayonunun Çobanabdallı kəndində yaşayan 13 yaşlı Arzu Qədimov H.Zərdabi adına tam orta məktəbin 7-ci sinif şagirdidir. O, demək olar ki, hər gün dərs oxumaqla yanaşı, atasına kömək etmək məqsədilə sürü də otarır.
Arzu ötən il Lütfi Zadə adına məntiq olimpiadasında rayon birincisi olub. Bu uğuruna görə ilk növbədə özünəinamına borcludur. İşlərini planlaşdıra bilməsi, hazırlığını düzgün həyata keçirməsi də uğur qazanmasında xüsusi rol oynayıb.
Arzu kənd həyatını çox sevir. O, kənddə yaşamağın bir çox üstünlüklərinin də olduğunu düşünür:
“Kənddə təhsil almağın yaxşı tərəfi odur ki, məktəbimiz evimizə yaxındır. Oraya piyada gedib-gəlirəm. Sürü otarmaq mənə öyrətdi ki, heyvanlar insanların ən yaxın dostu ola bilər. Təbiət çox gözəldir və biz bu gözəlliklərə zərər verməməliyik”.
O, təbiət qoynunda keçirdiyi vaxtı daha dəyərli sayır:
“Bir çox kənd uşaqları da mənimlə razılaşar ki, sosial şəbəkələrdə vaxt keçirməkdənsə, təbiətin qoynunda olmaq daha gözəldir...”
“Əvvəllər polis olacağımı düşünürdüm, amma indi həkim olmağı arzulayıram. Xəstə insanları sağaltmaq istəyirəm”, - deyə bildirib. Arzunun həyatı onu göstərir ki, kəndin sadə, təbiətə yaxın olan mühitində də böyük uğurlar əldə etmək mümkündür. İnanırıq ki, Arzu gələcəkdə yalnız öz arzularını reallaşdırmayacaq, həm də başqalarına örnək olacaq.
